Diçka po zihet te Hashim Thaçi: Haradinaj, Veseli, Limaj, Pacolli e Edi Rama i shkojnë mysafirë në shtëpi të re

    Presidenti i Kosovës, Hashim Thaçi, i ka ftuar për një darkë në shtëpinë e tij të re, në periferi të Prishtinës, udhëheqësit e koalicionit qeverisës të vendit, dhe kryeministrin e Shqipërisë. Takimin te Thaçi e ka bërë publik i biri i presidentit, i cili e ka publikuar një fotografi nga ndeja.
    Nata e së dielës i ka bërë bashkë në një tavolinë udhëheqësit e Kosovës dhe kryeministrin e Shqipërisë, Edi Rama.

    Presidenti i Kosovës, Hashim Thaçi, duket t’i ketë mbledhur në shtëpinë e tij të re, për një darkë me mish e me verë, udhëheqësin e Shqipërisë; kryeministrin e Kosovës, Ramush Haradinaj; kryetarin e Kuvendit të Kosovës, Kadri Veseli; dhe zëvendëskryeministrat e Kosovës, Fatmir Limaj e Behgjet Pacolli.

    Ata shihen duke pozuar të buzëqeshur, në një fotografi që e ka publikuar në llogarinë e tij në rrjetin social Instagram, në internet, Endrit Thaçi, i biri i presidentit kosovar.

    Duke u bazuar në fotografinë e publikuar, mund të supozohet se djali i Thaçit është ulur në darkë me burrat e shtetit. Në fotografi shihet një karrige bosh.

    Takimi mes krerëve të shtetit dhe mysafirit nga Tirana vjen pas përplasjeve mes udhëheqësve të koalicionit qeverisës në Kosovë për taksën ndaj Serbisë e Bosnjës, por edhe pas përplasjeve të vazhdueshme mes shefit të ekzekutivit kosovar dhe të parit të shtetit.

    Lexo edhe:  LDK-ja në gjah për tri nënshkrime që do ta çonin Thaçin në Kushtetuese