Mustafa: Mbetëm pa Çakorr, e pa viza

Kryetari i Lidhjes Demokratike të Kosovës, Isa Mustafa ka fajësuar kryeministrin Haradinaj dhe kauzat e tij të rrejshme për çështjen e liberalizimit të vizave dhe kufirit me Malin e Zi, raporton Periskopi.

Mustafa duke larguar përgjegjësinë nga qeverisja gjatë kohës sa ishte ai kryeministër, ka shkruar se do të ishte mirë që para ambasadave ku presin qytetarët për viza, të vendosen fotografitë e atyre, që sipas tij, me paturpësi sollën Kosovën në këtë situatë.

Tutje, Mustafa shkroi se BE’ja ka informuar Kosovën me kohë se nëse vonohemi me ratifikim të marrëveshjes së Demarkacionit, do të prolongohet edhe liberalizmi.

Lexoni të plotë reagimin e Mustafës në Facebook:

Liberalizimi, Çakori e Zhlebi

Mbetëm pa përmbushje të zotimeve për liberalizim dhe mbetëm pa përmbushje të zotimeve se kufiri do të zhvendoset ne Çakor. Ndërkaq, askush nuk merr përgjegjësi.

Ishte kontestimi që ia bëri Kryetari i AAK-së, tani Kryeministër, me kauzë të rrejshme marrëveshjes për kufirin me Malin e Zi që qoi që procesi i liberalizimit të mos fillojë me kohë. Ai dhe disa shërbyes të tij, deputetë e profesorë, ngulnin këmbë se kufiri është në Zhleb dhe Çakorr dhe se Kosova po humb 8200 hektarë. Këtë vit demarkacioni u ratifikua, e votuan 80 deputet, kufiri nuk po lëvizë, mbeti aty ku u caktua me marrëveshje, por vizat nuk u hoqën.

Do të ishte mirë që para ambasadave, ku rreshtohen e maltretohen me qindra qytetarë me nga një çantë dokumente për të marrë një vizë, t’ua vejmë fotot e atyre që me paturpësi, vetëm për të përfituar nga popullizmi, na sollën në këtë situatë. Edhe fotografinë e Qeverisë së sotme.

BE-ja nuk ishte parimore me Kosovën, se na vëri më shumë kushte sesa vendeve të tjera, por BE-ja na informoi me kohë, në vitin 2015 dhe 2016, se nëse vonohemi me ratifikim të marrëveshjes, do të prolongohet liberalizimi. Këtë e kanë ditur të gjithë!

Mos te kemi iluzione as në të ardhmen se me një Qeveri me 1/3 e ministrave me aktakuza, që merr vendime arbitrare, me 80 zëvendësministra, vizat nuk hiqen. Vizat së pari duhet t’ia heqin qeverisë së tanishme për ta quar në shtëpi, e pastaj t’ia heqin vetvetes duke e zgjedhur një qeveri e cila punon për interesat e qytetarëve e jo për klientelën e vet.